انت مش راجل ومراتك هي اللي ممشياك

امى واختى قعدوا يحرضونى على مراتى وكل ما اروح الشغل الاقى مكالمه من امى بتشتم على مراتى ودى مبتعملش حاجه غير انها بتنام ، دى معهاش عيال يعنى المفروض تساعد ، دى كل حياتها نوم وكل ما نطلع نخبط عليها تكون لسه صاحيه من النوم وكلام من ده كتير وكل مره امى تتصل تفضل تقولى انت مش عارف تحكمها انت سايبها كده بمزاجها. تخلينى ارجع كأنى مشحون وافضى كل شحنى على مراتى ، اضربها اخليها تنزل الليل كله تنضف ونيجى عند وقت النوم اقولها انتى نايمه اليوم كله كفاياكى وامى تخليها تنزل تنضف روحنا عند دكتور قالنا الخلفه مبنيه على النفسيه اكتر من اى حاجه ولازم نفسيتها تكون كويسه فضلت اهدى امى وزعقت معاها قولتلها بلاش تخلينى جاى مشحون عليها بلاش تخلينى أمد ايدى عليها علشان نفسيتها والله لما بمد ايدى عليها والله ما ببقى دارى بنفسى بعمل ايه والله ممكن امسك الحزام وأفضل ضىرب وانا مش عارف انا بعمل ايه وبعد ما اخلص واقعد مع نفسى أدرك انا عملت ايه وبعدين مراتى بدأت تقولى انا هروح بيت اهلى اقعد فتره هنتجمع انا واخواتى «أخواتها متجوزين برضه» هنتجمع كام يوم نقعد مع ماما انا مرضتش علشان كنت عارف ان مفيش تجمع ولا كلام من ده بس هى عايزه تهرب من اللى بيحصل انا يومها قولتلها لا بس خدت عهد على نفسى انى ممدش ايدى عليها تانى واكون كوبس معاها وبالفعل بقيت بحاول بقدر الإمكان اعمل كده امى تقولي انت مش راجل انت مش عارف تمشيها ازاى هى اللى ممشياك زعقت مع امى جامد يومها عليت صوتى عليها فعلا جدا كان أول مره ف حياتى ده يحصل ومن بعدها انا وامى مبنتكلمش خالص ولا بنسأل ف بعض ولا كأنى ولدها ولا كأنها امى انا غلطان طيب ؟