قفلت منه علشان تخين وقصير وبكرش

انا ارملة اتعرفت علي رجل من مواقع الزواج مدة شهرونصف هو راجل محترم متدين متزوج ويريد الزواج من زوجه تانيه نظرا لظروف زوجته الصحيه وهي اللي طلبت منه انه يتزوج وطلب مني الزواج سرا عند ماذون علشان رفض اهلي اني اتزوج وافضل اربي اولادي وكمان رفض اولادي الزواج ومن خلال معرفتي بيه عرفت انه بخيل شويه في الماديات بس هو طيب جدا و محترم ومركز مرموق.
وبعت ليا صورة له اول ماشوفت صورته بصراحه نفسي قفلت منه مش بعيد عليه بس كان تخين اوي وبكرش واقصر مني فكرت اني ارفضه لاني لقيتني مش متقبلاه وكمان وفعلا قولتله انا مش هكمل وكل واحد يروح لحاله رفض انه يسبيني وفضل يقنع فيا انه حبني واتعلق بيا ومتمسك بيا ومن كتر الحاجه وتصميمه عليا وضغطه اني اوافق عليه هو بصراحه كان بيعاملني كويس جدا كان محسسني اني ملكه بالنسباله صعب عليا اني اسيبه رغم عدم تقبلي لشكله تغاضيت عن الموضوع ده وحاولت اقنع نفسي وبصيت لصفاته وتدينه واخلاقه وكمان دكتور كبير له مركزه ووافقت علي الزواج منه وفي يوم الزواج بعد ما تم العقد ذهبت معاه و اول ما دخلت الشقه وشوفته ادامي قرفت من شكله له تركيبه كده خاصه مكنتش متقبلاها نهائيا وانا جميله جدا وجسمي متناسق مكنتش طيقاه يجي جنبي واصابتني حاله نفور رهيبه منه بس كنت هعمل ايه مفيش مفر الزواج تم خلاص وطلب حقه الشرعي مني واتعامل معايا كزوج دون تقبل مني ولم اتجاوب معاه نهائي وكنت قرفانه منه بشكل غير طبيعي وطبعا هو حس بكده وكان مضايق وظهر عليه الضيق والزعل بس انا اعمل ايه غصب عني فكرت وقولت انا لازم انهي الزواج ده وطلبت منه الانفصال وهو رفض وقالي هديكي فرصه تانيه ونحاول مره تانيه انا رفضت وصممت علي رأيي ولما رفض استفزيته وصممت اكتر راح مطلقني بعد ساعه من زواجي وسبته ومشيت وانا قلبي موجوع علي نفسي وعلي الجوازة اللي اتحسبت عليا وروحت بيتي هو كان صعبان عليا بس غصب عني لولا تصميمه والحاحه عليا مكنش هيتم الزواج وعملي حظر واتس وفيس صعبت عليا نفسي اوي وقولت فين حبه ليا كان بيكذب عليا وبيمثل عليا و تاني يوم لقيته بيتصل ليا وبيعاتبني اني ضحكت عليه وغشيته انا مرضيتش اجرحه واقوله سبب نفوري منه وعدم تجاوبي معاه وجرحني بكلام كتير وبعدين طلب مني ارجع له واني تحاول معاه مره تانيه واتاسف علي كلامه وانا رفضت ارجع ومازال بيحاول معايا كل يوم يتصل عليا ارجع له وبيقولي اني ظلمته هل فعلا انا ظلمته ؟