ارمله اخويا رمتلي العيال.. ومراتي شيل شيلتك وهاتلهم مربية
ارمله اخويا اتجوزت شخص تاني لكن بعد مدة الشخص ده حكم عليها يا ترمي عيالها من اخويا او الطلاق لانه مش عايزهم في بيته، المهم ارملة اخويا جابتهملي البيت وسابتهم ومشيت وولاد اخويا طفلين ولد وبنت صغيرين لسا مش في سن مدراس
مراتي جن جنانها وقالت انا مش هربي اطفال هانوا على امهم ورمتهم، يعني هي تروح تتجوز وتعيش حياتها وانا اشيل الطين واشيل قرف عيالها عشان البيه جوزها مش عايز عاليها وانا مالي دي مش شيلتي، ودلوقتي هي سايبه البيت وسايبه الولاد من شهرين تقريبا ومش راضيه ابدا الرجوع
بتقولي يا انا يا عيال اخويا، حاولت افهمها ان دول عيال ايتام ومفيش حد حرفيا هيقدر يراعهم لكنها بتقولي خلاص طالما صعبانين عليك روح اجرلهم بيت وهاتلهم مربيه ترعاهم وشيل شلتك، ومش عارف اعمل ايه معاها ايه هل اطلقها واتورط انا بعيالي وعيال اخويا ولا ارمي ولاد اخويا خصوصا اني مش عارف هحط ولاد اخويا فين امي ميته واخواتي البنات متجوزين.
