شابة تشتكي ريحة ايدي خطيبي مش حلوة وده مضايقها

لو سمحت نزل مشكلتى بس بدون اسم وشكرا لحضرتك..

انا مخطوبه بقالي سنه ونص وخلاص المفروض هتتجوز في شهر ١٠ بس المشكلة معايا ان شغله مش عاجبني هو بيشتغل في النقاشه وبياخد شغل في الأماكن الجديده وبيكسب كويس ومش بيبخل عليا ولا عيد ميلادي ولا مواسم بس هو بيشتغل من غير جلافز وايده دايما ريحتها مش حلوه وعليها نقط بويهات كتير واوقات بيجي عندنا وهو راجع من الشغل اسفه بس ريحته بتبقى جاز على دهانات على عرق ووشه كمان بيبقى فيه نقط فالموضوع بيبقى مقرف جدا هو معاه معهد سنتين

وانا معايا بكالوريس تجاره وكانت خطوبة صالونات يعني مش حب ولا كنت اعرفه قبل الخطوبه بس هو كريم معايا ومع اهلي وبيصلي وعاملي مصروف شهري ٧٠٠ جنيه حتى لو بسيط بس كفاية انه بيقدرني ومستحيل يدخل بايده فاضيه حتى لو جالنا يومين او ثلاثه ورا بعض لظروف التجهيز للجواز

شغل خطيبي عامل ضغط نفسي عليا

بس موضوع شغله ده بقيت حساه انه عامل عليا ضغط نفسي وخايفه بعد ما اتجوز مقدرش اتجاوز واندم اني اتجوزته وكمان علشان لما نخلف والاولاد والمدرسة هيقولو ايه حتى صحباتي بقولهم انه بيشتغل في المقاولات مش بقدر اقول على شغله مش عارفه ده سبب مقنع اني أفسخ الخطوبه ولا هسببله اذى نفسي ....

ممكن تنصحوني انا عندي دلوقتي ٢٦ سنه وهو ٢٨ وعلى فكرة هو معتمد علينا في كل حاجه لانه ملوش حد باباه ومامته متوفين وملوش غير اخين متجوزين فاحنا اللي يعتبر بنعمل كل حاجه في الشقة والعفش على ذوقنا هو بس بيدفع او بيشتري اللي بنقوله عليه

انا بقول كل حاجه علشان تبقوا فاهمين الموضوع حلو وتقدروا تنصحوني اكمل ولا لا..