موتّها عشان أنتقم لبنتي.. اعترافات المتهم بقتل زوجته في بدر
أدلى الزوج المتهم بإنهاء حياة زوجته في منطقة بدر، باعترافات مثيرة أمام جهات التحقيق حول تلك الواقعة المأساوية، إذ أنه تخلص منها نتيجة نشوب خلافات بينهما تطورت إلى حد القتل، بعدما أمسك بملاءة سرير وطوق بها عنق المجني عليها وخنقها حتى لفظت أنفاسها الأخيرة.
موتّها عشان أنتقم لبنتي.. اعترافات المتهم بقتل زوجته في بدر
وقال المتهم أمام جهات التحقيق، إنه تزوج من المجني عليها منذ 5 سنوات وأنجب منها ولدا يدعى يونس وبنتا تدعى إحسان، لافتًا إلى أنهما كانا جميعًا يقيمون في منزلهم بمحافظة المنيا، وبعد فترة ما انتقلوا إلى القاهرة نتيجة نشوب خلافات في منزل الأسرة.
وتابع: أبويا قالي خد مراتك واطلع على القاهرة وجيت التجمع الأول وأجرت شقة جنب أهل مراتي لأنهم ساكنين هناك.. وفي يوم وأنا في الشغل لقيت واحد صاحب حمايا بيكلمني وبيقولي إن بنتي إحسان ماتت.. فأنا جريت بسرعة ولما سألتهم هي ماتت إزاي معرفتش آخد منهم حق ولا باطل.
وأوضح المتهم أمام جهات التحقيق، أنه لاحظ وجود آثار جروح بسيطة في وجه ابنته خلال توجهه لدفن جثمانها، وعندما سأل أهلية زوجته انفعلوا عليه وحاولوا أن يضربوه، ومنذ ذلك الحين وقرر أنه لابد أن ينتقم لابنته ويقتل زوجته مثلما قتلت ابنته.
واستكمل: من وقت ما بنتي إحسان ماتت وأنا بفكر إزاي أنتقم لبنتي وأقتل مراتي.. وحاولت أعمل الموضوع ده أكتر من مرة بس فشلت.. لحد ما جيت البيت في مرة وكنت راجع من الشغل ولقيت ابني يونس بيعيط فافتكرت بنتي إحسان وزعقت لمراتي وقولتلها انتي بتضربي الواد وعاوزة تموتيه هو كمان.. فردت عليا وعلت صوتها وضربتها كام قلم وقولت أنا هقتلها وأنتقم منها.
وأضاف الزوج: كانت قاعدة على يميني روحت خانقها من وراء وحطيت دراعي على رقبتها وبعدين حطتها بين رجليا لحد ما اتأكدت إن النفس راح خالص.. وبعدها حطيت إيدي على رقبتها وخنقتها وجبت الملاية حطتها عليها ولفيت مفرش على رقبتها لحد ما تأكدت إن الروح طلعت.. وبعدين روحت شغلت فرن وجبت مصحف من الأوضة التانية وحطيته جنبها.
