خطيبي متقمص دور «البخيل وأنا»

لو سمحت انا مخطوبه من فترة حوالى سنه وخطيبى بيعمل معايا تصرفات غريبه يعنى اول الخطوبه كان كويس وهو جايلى يجبلى مثلا شوكلت بسكوت ويجب معاه حاجه للبيت بعدين بطل حاجه البيت عندى وبقاله مثلا ٥ شهور كل ما يكلمنى يقولى وانا جاى اجبلك ايه اقوله مش عاوزه حاجه خالص يقولى لا هجبلك كذا علشان عارف انك بتحبيها وهجيلك منها ٥ وانا اقوله لا المهم يجى بقى يتلكك على اى حاجه زى مثلا اتصل عليا ومردتش من اول مره او بعت رساله ومشفوتهاش فى وقتها او اى موقف تافه ولما يجيلى يقولى انا مجبتش جاجه وانا جاى عقاب ليكى على الموقف اللى حصل ويقولى موقف تافه من اللى حكيته ده ومش بيجيب اى حاجه وهو داخل حتى علشان المنظر قدام اهلى.
بقاله على كده ٥ شهور وهو بيجى كل اسبوع مره وبطل يخرجنى خالص معرفش التغير ده حصل مره واحده هو حالته ميسور يعنى الموضوع بالنسبه له مش هيفرق فى حاجه ومره اخد السماعه بتاعتى ومرجعهاش لنفس السبب كنت هرجعهالك بس علشان عملتى كذا مش هرجعها مع انها غاليه واصليه انا مش فاهمه ايه ده والشكل العام مبقاش لطيف عندى فى البيت خالص لانه طبعا بيجى ياكل ويشرب ولو فى ماتش يتفرج عليه مع اخويا وبابا يعنى ممكن يقعد ٧ ساعات وانا بدأت اقفل منه ومن تصرفاته ديه فعاوزه رايكم فى تصرفاته ديه ممكن يكون هدفها ايه لانى فعلا مش فاهمه التحول ده هو زميل اخويا فى الشغل بس دلوقتى نقلوه مكان تانى غير اللى فيه اخويا ومكنتش اعرفه قبل كده