رسالة حزينة من طفلة تبحث عن اسم لها
نشر النشاط رامي الجبالي علي صفحتة قصة طفله تدمي القلوب وهي في الحقيقة رسالة الي كل اب وام ات يقدروا حجم ماساة الانفصال او ان يعيش الابناء في جو غير صحي لهم ويقول رامي الجبالي في بوسته علي صفحات فيس بوك
فتاة ليس لها اسم
انا مليش إسم و لا أم وعندي تقريبا ١٣ سنه ... ينفع يبقي اسمي سما او أسماء ؟
انا طفله عاشت مع أمها زي اي بنت ... بس معرفش ابويا و لا عمري شوفته و لما كنت بسأل عنه كان كل واحد بيحكيلي حكاية غير التانيه ... كنت عايشه مع أمي و اخواتي الأكبر مني ... فجأه وانا عمري تقريبا ١١ سنه امي تعبت و دخلت المستشفي و ماتت .. ماتت و سابتني .. و وحشتني.
بابا ظهر اخيرا
في العزاء ظهر واحد قالولي ان ده باباكي .. بابا ازاي ؟ بابا مين ... هو انا عندي بابا !
بابا مكانش يعرف ان عنده بنت اصلا .. ده اللي فهمته بعد كده .. هو اتخض زيي بالظبط .. هو ميعرفش ان عنده بنت اصلا !
عرفت ان بابا و ماما كان بينهم قصة حب و انتهت بالجواز ... بس بحاجه اسمها جواز " عرفي " ... ابويا و امي اختلفوا و سابوا بعض معرفش ليه ... بس سابوا بعض و خلاص.
ماما اللي يرحمها كانت حامل فيا وقت ما سابوا بعض ... و للأسف مقالتش لبابا ان عنده طفله اصلا لحد ما ماتت.
عيشت مع ماما و كبرت بدون شهاده ميلاد و بدون تعليم مع اني شاطره ... و مكونتش فاهمه ليه كل الأطفال بتروح مدرسه و انا لا .. انا كمان شاطره و اعرف اروح !
بابا حبني ... وانا كمان ❤
اصبحت في اسرة اخري
بابا اخدني اعيش معاه ... و اكتشفت ان عندي اخوات تانيين و بيحبوني اوي .. و زوجته كمان بتحبني اوي .. و بقي ليا بيت و عائله من تاني.
انا دلوقت عمري ١٣ سنه مش بروح مدرسه، عمري ١٣ سنه بدون شهادة ميلاد، عمري ١٣ سنه بدون إسم ...
بابا عمل تحليل DNA و طلعت بنته فعلا ... بابا بقاله اكثر من سنتين بيحاول يعملي شهاده ميلاد عشان ادخل مدرسة و اتعلم بس للاسف مش عارف .. لو تعرف تساعدني و تساعد بابا عشان ادخل المدرسه ؟
انا نفسي يبقي اسمي سما او أسماء ... لو ينفع.