أهل مراتى ناس باردة و طماعين -عايزين يسكنوا بشقى السنين

السلام عليكم ، انا مهندس باشتغل فى الخليج من حوالى 13 سنة ، متجوز و مراتى و الولاد قاعدين معايا هنا ، والدى اتوفى و ورثت مبلغ الحمد لله مش بطال خالص ، حطيته على تحويش العمر و قررت ابنى عمارة صغيرة فى التجمع .

العمارة الحمد له خلصت على 8 شقق ، احنا خدنا دور كامل و كل واحد من الأولاد شقة يتجوز فيها . يتفضل 4 شقق قررت ابيع اتنين و نأجر اتنين و كدة نقدر الحمد لله نرجع مصر نرتاح من الغربة .
أخر أجازة كنا بنشطب شقتنا و بنفرشها و عملنا عزومة كبيرة لأهل مراتى و أهلى ، أثناء العزومة حماتى و اخوات مراتى ماكانش ليهم سيرة غير ان المكان عاجبهم و عايزين ينقلوا التجمع . و حماتى قعدت كل شوية توشوش مراتى و تاخدها على جنب ، وانا مش عارف فيه ايه .

بعد ما مشيوا لقيت مراتى بتقولى ، ايه رأيك نفاتح ماما و بابا انهم ييجوا العمارة ياخدوا شقة ، قلت لها مش مشكلة بس بالنسبة للسعر انا طبعا مش هاتعامل معاهم زى الغريب دول اهلنا . لو هيأجروا هناخد نص المبلغ اللى بنأجر بيه ، و لو هيشتروا مش هاخد منهم غير سعر تكلفة الشقة اللى هو كان ساعة ما بنينا غير دلوقتى طبعا .يعنى تقريبا تلت سعر الشقة . لقيتها اتنرفزت و قالتلى انت عايزنى آخد فلوس من أهلى فى عمارتنا ؟ قلت لها مفيش حد بيوزع شقق ببلاش .ان ممكن آخد منهم المبلغ قسط مثلا ، رفضت و غضبت عندهم ، ومن ساعتها مفيش لا حس و لاخبر.

كلمت ابوها قالى بقى بعد ما وقفت جنبك فى غربتك بتبخل عليها ان أهلها يعيشوا معاها ؟ و قفلنا على خناقة. انا مش عايز أخسر مراتى و لا اهلها بس هم فعلا طماعين . و الولاد متبهدلين فى النص.و بعتتلى مع حد معرفة ان آخر كلام عندها يا تكتب الشقة باسمى و أهلى ييجوا يقعدوا فيها يا نتطلق.