عزومة علي الفطار تنكد علي العروسة الشابة

تبادل العزومات في شهر رمضان المبارك هدفة تاكيد المودة والرحمة بين الاقارب والاصدقاء وليس مجال لتقيم انواع المأكولات وتكلفتها وهذا ماتعرضت له فتاة شابة قامت والدتها بعزومة اهل خصيبها وتقول الفتاة في رسالتها

سلف لانجاز عزومة

انا امي استلفت ٨٠٠ جنيه من ناس جيرانا علشان خطيبي كان مسافر ومش هيرجع غير بعد العيد فكان لازم نعزمه على الفطار قبل ما يسافر ف ماما اتصرفت في الفلوس علشان لسه مقبضناش المعاش و عملت ما بوسعها علشان تعمل عزومة تشرفني قدامهم ف مكنش متاح بالفلوس اللي معانا دي غير نجيب سمك لأنهم حوالي ٥ واحنا ٤ وانتوا عارفين اللحمة والفراخ هتتكلف كام دلوقتي لو حبينا نجيبهم للعدد ده غير جنب الاكل لازم حلويات او فاكهة ف عملنا السمك وهما لما شافوا السمك معجبهمش وقالي هو حد بياكل سمك في رمضان فين المحاشي والبشاميل واللحمه بضحكة سخرية ومامته قالت الدكتور مانعني من السمك ونفس الموضوع اخته وكنا في نص هدومنا وهما قاعدين وممدوش ايدهم في الأكل

ناس ناقصة بشاميل
لو سحمتوا تصورا انتم الموقف يبقى عامل ازاي حتى مجبروش بخاطر امي وتعبها وجريها من قبلها بيومين علشان تقضي الفلوس وتجيب الاكل ومخافوش على زعلنا وهو قال قاعد محروج من اهله علشان احنا مشرفناهوش قدامهم ويقولي ده أنا جايبلك علبة كنافة من ايتوال علشان اشرفك وانتي ليه مضغطيش على امك تعمل حاجه غير دي طيب ليه مقولتيش انكم هتعملوا السمك ده

فطار كلاكيت تاني مرة
وانا حاسة اني كنت في كابوس ده انا لسه مخطوبة يوم ٢٧ يناير اللي فات هعرف منين بيحبوا ايه ومش بيحبوا ايه ومشيوا قبل اذان العشاء علشان يشوفوا يفطروا ايه علشان مامته تاخد الدوا بتاعها
النتيجه امي زعلت لما الضغط بقى عالي جدا وكانت هتوصل لجلطة لولا ستر ربنا انا مش عارفه اعمل ايه احنا ناس على قد حالنا وايتام وملناش غير ماما وخالنا بيجي في المناسبات وانا زعلانة من اللي حصل ده ومش عارفة اخد موقف صح لاني معرفش هما عندهم حق ولا لأ انا كتبت وعارفه ان حد فيهم ممكن يشوف رسالتي دي بس انا مش خايفة من رد فعلهم لاني زعلانة على كىسر خاطرنا وبالأخص زعل ماما لأن محدش يعرف هي تعبت وما زالت بتتعب معانا ازاي وبتعمل ايه علشان تسترنا وتجهزنا وتصرف على اخواتي في التعليم وانا متكملتش معاه من يوم الاحد في الموضوع ده وهو قصر معايا في السؤال من يومها وانا كمان مبقتش اسأل
اسفه يا جماعة لو طولت عليكم بس جوايا كلام كتير اوي بس ده المختصر للموقف اللي حصل...