رضوى الشربيني تحدد مواصفات الشخص الذي سيتزوجها وتكشف رصيدها في بنك الوجع

شغلت الإعلامية رضوى الشربيني محركات البحث ومنصات السوشيال ميديا بعد كشفها عن مواصفات الرجل التي تبحث عنها في زوجها المستقبلي، مشيرةً إلى أنها مرت بتجربة حب حقيقية بعد انفصالها، لكنها قصة لم يكتب لها الاستمرار.

حب بعد الطلاق

وأضافت رضوى الشربيني "قابلت الحب الحقيقي بعد الانفصال ومكنش تعويض عاطفي وإنما قصة حب حقيقية، ولكنها انتهت وأنا مبحبش أتكلم عن القصص اللي انتهت بسبب إننا اتفقنا إننا لا نتفق".

وتحدثت رضوى الشربيني عن مواصفات الزوج الذي تتمناه قائلة: "لازم يكون راجل قادر والقدرة هنا بمعنى إنه يكون قادر على العفو عند المقدرة، عشان ميبيصش على أخطائي ولا صغائر الأمور اللي أنا بعملها، وهيكبر دماغه ومش هيتلككلي ومش هيبص على عيوبي، ولازم يكون قوي ويشاركني كل أموري، ويكون سند وقوته دي تكون معايا مش عليا، ولما يقرر إنه مش عاوز رضوى الشربيني ميعملش أي حاجة غير إنه يجيني ويقوللي في وشي أنا آسف مش قادر أكمل".

مطلوب زوج ناجح

وأضافت: "لازم يكون ناجح، مقدرش أتجوز راجل مش ناجح ولا أنا اكون أنجح منه، ويكون عنده طموح ويتقي ربنا في البني آدمين، ومكونش أنا أولهم لكن مامته وباباه، ولازم يكون بيحبني قوي وبيهتم بيا قوي، ويعرف يتعامل معايا لأن أنا صعبة، ويكون حنين وطيب ودمه خفيف عشان مقدرش أتجوز راجل دمه تقيل أبداً، ويكون شيك وخفيف في نفسه".

واعترفت الإعلامية رضوى الشربيني بأن الجمهور أخذ عنها صورة المرأة الحديدية، بسبب تصريحاتها عن الرجال في برنامجها التليفزيوني، ودعمها المستمر للمرأة.

وقالت "الحياة بعد وفاة امي اختلفت كتير وبقيت بعيط قوي، والناس واخده عني صورة المرأة الحديدية اللي من غير مشاعر ولا شعور وده عكس شخصيتي".

رصيدي في بنوك الوجع أكثر بكتير من ورقة الطلاق

وأضافت أنها لم تشعر بالوجع عندما أمسكت ورقة طلاقها بيدها، مؤكدة أن رصيدها في بنوك الوجع أكثر بكثير من قسيمة الطلاق حيث قالت عن تجربتها "اكتشفت نفسي ولقيت إني إنسان مش قابل يعيش العيشة دي، ورصيدي في بنوك الوجع أكثر بكثير من قسيمة طلاق، ومقدرش أعد الأوجاع دي".
وتابعت: "قسيمة الطلاق مش وجع، إنما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وانا متوجعتش لما مسكت قسيمة طلاقي في ايدي، ومش في كل الأوقات كلمة إنتي طالق بتوجع، خصوصاً اذا كان عندك قناعة إن الكلمة دي هي دواء مش وجعك".