طعني في شرفي..سبعينية تطعن ابنها لمنعه من تعاطي المخدرات
في واقعة مؤسفة شهدتها منطقة بولاق الدكرور، أقدمت سيدة مسنة على طعن ابنها بسكين إثر خلافات عائلية حادة بسبب إدمانه المخدرات.
سبعينية تطعن ابنها لمنعه من تعاطي المخدرات
وننشر أقوال السيدة والدة المجني عليه وجاءت كالتالي: أنا عندي 3 بنات و4 أولاد ومن وقت ما زوجي توفي وأنا بجري عليهم لحد ما ربنا كرمني وزوجت البنات كلهم وسترتهم لكن الرجالة محدش فيهم اتجوز وبعدين أنا ساكنة في بيت مكون من أربع أدوار أخدته ورث عن والدتي وأولادي الصبيان قاعدين كلهم معايا كل واحد قاعد في شقة لوحدة وواحد منهم عنده ضمور في المخ والعضلات قاعد معايا عشان أرعاه.
وأضافت المتهمة: أنا بشتغل على باب الله أوقات أخدم وانضف في البيوت وربنا بيكرم وعندي ابني المجني عليه ده تاعبني وعاوز ياخد فلوس على طول وقاعد من غير شغل ومبهدلني ومطلع عيني وكل ما أجيب قرش عاوز ياخدة مني وكذا مرة يهيني ويشتمني ويبهدلني وأنا كنت بعدي وبسكت وكذا مرة أروح أعمله محاضر في القسم.
وأكملت السيدة المتهمة: يوم الواقعة حصلت بيني وبين ابنى مشادة كلامية وهو قعد يشتم فيا ويهزقني ووصل بيه الأمر أنه اتهمني في شرفي وكل ده بسبب إن في واحدة ست غلبانة مأجرة شقة في العمارة بتاعتي وأنا قولتله خد إيجار الشقة دي مصاريفك والست اللي مأجرة الشقة عاملة عملية وقالتله أصبر عليا شوية وأنا كمان قولتله أصبر عليها شوية فشتمني وهزقني وقالي أنتي مالك قولتله ده بيتي وعمارتي أنت عاوز أيه منى مش كفاية بديلك إيجار الشقة على الجاهز.
وختمت السيدة أقوالها أمام جهات التحقيق، قائلة: وبعدين نزل تحت وأنا نزلت وراه عشان أهديه ففضل يشتم فيا تاني وكان ماسك في أيده عصايا محستش بنفسي غير وأنا بطلع أجري على البيت لقيت سكينة جبتها وطلعتله تاني قولت أهوشه بيها يمكن يخاف علشان كنت جبت أخرى وتعبت منه وخبطه بالسكينة في بطنه بس محستش أنا عملت كده أزاي وليه ووقع على الأرض، فقعدت جنبه وقولتله يا ابني حرام عليك تعبتني ليه توصلني لكدا قصرت معاك في أيه وفضلت جنبه لحد ما الناس جت خدته وطلعنا بيه على قصر العيني.
