بعد زواج 3 أشهر.. منة تطلب الخلع: جابلي بواقي جاتوه بـ17 جنيه
أقامت شابة تُدعى منة دعوى خلع أمام محكمة الأسرة بالقاهرة الجديدة، ضد زوجها، بعد مرور ثلاثة أشهر فقط على زواجهما، بسبب اكتشافها أن زوجها بخيل، وهو الأمر الذي لم يظهر خلال فترة الخطوبة.
بعد زواج 3 أشهر.. منة تطلب الخلع: جابلي بواقي جاتوه بـ17 جنيه
وقالت منة في دعواها، إنها كانت مخطوبة لزوجها لمدة عام، ولكنه كان يزورها فقط مرة كل شهر بسبب التزامه بالخدمة العسكرية.
وأوضحت أن زوجها كان دائمًا يبرر قلة إنفاقه، بأن دخله محدود ومرتبط بالخدمة العسكرية، وهو ما تفهمته وقتها، خاصة أنه كان يقول لها ذلك بشكل مهذب، دون أن تُدرك أنه يخفي جانبًا من شخصيته.
وبدأت المشكلة الحقيقية بعد الزواج، حيث تقول منة: “اكتشفت إنه بخيل جدًا، وكل ما أقوله نفسي في حاجة بسيطة زي حاجة حلوة أو جاتوه، يقول لي إنه ملوش لازمة أو ظروفه ما تسمحش، وآخر مرة طلبت منه يجيب لي جاتوه عشان نفسي فيه، راح جاب لي كسر جاتوه كان بواقي عند محل الحلويات بـ17 جنيه بس”.
وأضافت: “كان بيبرر كل تصرفاته بحجة إنه حريص وعايز يوفر، لكن الموضوع كان أكتر من كده، مفيش مرة حسيت إنه عايز يفرحني أو يقدرني، كنت بحس إن أي طلب ليا مهما كان بسيط بيعمله وهو متضايق أو بيتهرب منه تمامًا”.
وأشارت منة في دعواها إلى أنها حاولت في البداية التكيف مع أسلوب زوجها في الإنفاق، لكنها شعرت أن الأمور تزداد سوءًا يومًا بعد يوم.
وقالت: “مفيش أي مبادرات منه علشان يخليني أحس بالسعادة، كنت دايمًا بحس إن طلباتي البسيطة عبء عليه، رغم إنه مش فقير للدرجة دي، لكن هو شايف إن السعادة والرفاهية حاجات ملهاش لازمة”.
لم تتحمل منة الوضع طويلًا، وقررت بعد ثلاثة أشهر فقط من الزواج، أن ترفع دعوى خلع أمام محكمة الأسرة بالقاهرة الجديدة.
وتابعت: "أنا مش عايزة أكمل حياتي بالشكل ده، الحياة مش أكل وشرب بس، دي مشاركة وسعادة، وأنا شايفة إن حياتي معاه هتكون كلها ضغوط ونكد بسبب بخله".
لا تزال الدعوى قيد النظر في محكمة الأسرة، حيث من المقرر أن يتم استكمال التحقيقات في الواقعة.
