كنت هكسر التليفزيون بسبب استفزازك| «شذى» تهاجم «شاكوش»

شنت المطربة شذى، هجوما حادا على مؤدي المهرجانات الشعبية حسن شاكوش، على خلفية اتهامه صُنّاع أغنية «حاجة مستخبية» لمحمد حماقي، بسرقة اللحن من أغنية تركي، قائلة: «كلامك بالنسبة ليّ كوميديا سوداء، وهبد غير طبيعي».

كتبت شذى، عبر حسابها الشخصي على موقع التواصل الاجتماعي «فيسبوك»، عن تصريح حسن شاكوش: «كنت بضحك وعايزة أكسر التليفزيون من كمية الاستفزاز، وبالأخص الجزء بتاع الرد إن محمد حماقي أصلًا سارق اللحن من أغنيه تركي؟ وأساسا الأغنية التركي نازلة بعد أغنيه حماقي بسنتين على الأقل!».

أضافت شذى: «أغنية حماقي من 2012 جايبة 16 مليون بس؟! نقف بقى هنا.. أولًا لما نجحت أغنية وسارق لحنها، طيب كنت من باب العلم بالشيء ثقف نفسك واعرف تاريخ اللحن ده إيه، ومين اللي واخده من مين.. تاني حاجة قصدك إيه بأغنية حماقي جايبة 16 مليون بس، إنك أجمد وكده من حماقي! ما هو مش معنى إن في هوجة وانحدار في الذوق، تتخيل أنك جامد أوي.. وتتكلم بتعالي كأنك مغني قصيدة الأطلال».

وتابعت شذى: «والله أمثلة بجد تكره الواحد في اليوم اللي فكر يسيب فيه حاجات كتير بيحبها، علشان يخبط في العالم دي.. ولقب فنان ده يتقال على كل من هب ودب، وبقى مقياس النجاح وتقدير حجم الموهبة مربوط بالمشاهدات، وحسابات أبعد ما تكون عن المهنية والفن لنا الله والله».

رفض مطرب المهرجانات حسن شاكوش، اتهامه بسرقة لحن أغنية "حاجة مستخبية"، للفنان محمد حماقي، واستخدامه في أغنية "بنت الجيران" الشهيرة.

وقال حسن شاكوش، خلال استضافته في برنامج "الحكاية" الذي يقدمه الإعلامي عمرو أديب عبر قناة MBC مصر: "حماقي عامل أغنية اسمها حاجة مستخبية، كان بقالها 5 سنين على يوتيوب عاملة 16 مليون".

وأضاف: "قالوا إحنا سارقين لحن حاجة مستخبية، وحصلت مفاوضات خاصة بأرباح موقع يوتيوب بين شركتي وشركة النجم محمد حماقي، واتفقنا تتقسم أي أرباح على 3 شركات".

وتابع شاكوش، : "اللي عرفته إن حاجة مستخبية اللحن أصلا مسروق من لحن تركي".