محمد رمضان من بيروت :انا من اسرة بسيطة ولست مغرورا!!!!
عبر الفنان محمد رمضان عن استياءه الشديد وحزنه بسبب الهجوم الذي يتعرض له رغم نجاحاته الأخيرة، مؤكداً أنه يثق بالله بقوّة.
و قال رمضان خلال حلوله ضيف على برنامج "صوت بيروت" المذاع على التلفزيون اللبناني: "أنا اتولدت في عائلة متوسطة وأغنياء النفس والأخلاق والقناعة ومنحوني كنوز بتمنى أقدر أورثها لولادي وهي القناعة والكرامة وأشياء كتير غيرها أهلي كانوا لا يملكون غيرها واللي مع الخبرات شوفت إن ناس بتملك المال ولكن لا يملكون ما تملكه أبويا الراجل البسيط وأي شخص أبوه وأمه ربوه يستطيع يكون أهم شخص على الكوكب، وأنا أستطيع أواجه أي حروب وأحقق أي طموح في العالم لأني ورثت ثقتي بالله من أمي وأبويا وقالت لي مفيش شيء ربنا ميقدرش يعمله".
و أضاف" أنا واثق في ربنا وعلى يقين إن اللي خلق القمر وخلانا نرفع راسنا نشوفه هو اللي خلقني ومفيش مستحيل ودا مش معناه ندعي ربنا ومنعملش ونجتهد ونخطط والوعي قبل السعي، ومن وأنا في مسرح المدرسة حلمت أكون نجم، ورحلة الحياة مرة واحدة ولازم نتسلح جيدا قبل أي خطوة ما دام لسه قاعد في بيت أبوك وأمك ولسه بتحلم يبقى خطط وأدرس وشوف نقاط قوتك والحرب ضد نجاحي وكل ما بتقدم أكتر بقابل الأصعب؛ لأن السمك المفترس في عمق البحر".
و تابع" مستحيل أبكي ولا عاش ولا كان ولا يستطيع أحد أن يبكي محمد رمضان إلا شخص بحبه واللي بيبكي مش محارب وأنا ممكن أبكي على فراق حبايب أو لو غبت عن زوجتي وولادي فترة طويلة وعمري ما أبكي في معركة وإلا هخسر والدنيا لا تحترم جبانا".
و استكمل رمضان حديثه قائلًا: "أنا مش مغرور نهائي لأن الغرور بيصيب الشخص اللي اكتفى واللي حقق اللي عايزه وبيبدأ يحس بذاته ولكن أنا شخص طموح والطموح والغرور لا يجتمعان في شخص، والمتعالي شيء والمغرور شيء آخر، والاتنين مش عندي الحمد لله ويبدو من بعيد الناس بتشوف كدا ولكن اللي بيتعاملوا معايا مش بيقولوا كدا خالص وجمهوري لما بيقرب ليا خطوة بقرب له، ومن المستحيل الطبقة الفقيرة تنزعج مني واللي راكب مرسيدس هو اللي بيزعل وبيغير من اللي راكب لامبورجيني أما الشخص اللي مش راكب حاجة خالص بيتبسط للنجم اللي طلع من وسطنا وحقق هذا النجاح وبالنسبة له بيبث داخله الأمل وبيقوله هتقدر تنجح وتوصل ودا شيء ميزعلش جمهوري وممكن يزعل بعض الناس التانية".
و أضاف" الكليبات بتاعتي فيها قوة وأنا اخترت مدرسة مختلفة والغناء جه بالصدفة لأني ممثل وحققت نجاحات كتير وعملت أغنية لإعلان والأغنية تخطت نجاح الإعلان وبقت في كل مصر ومكسرة الدنيا وجمهوري حبها وأنا بحب جمهوري وأنا صوتي حلو في نوع مزيكتي ولو مطرب مستحيل يغني الأغاني بتاعتي لأني بغني بسرعة 160 وأهم مطرب مش هيقدر يعمل زيي ومينفعش أجيب مهندس أقوله أبقى دكتور، أنا نوع مدرسة في الغناء ملهاش علاقة بالطرب ولكن موجودة وهما الأعلى أجرًا وجماهيرية في العالم وهي جديدة في مصر وكنا بنقول عليها UNDERGROUND ومقدرش أقول صوتي حلو عمومًا، والمطرب اللي بيقول آه يا ليل صوته هيكون وحش في الأغاني بتاعتي، ودا محتاج صوت ذكوري رجالي وشخص مافيا، وأنا مهموم بطموحي".
