وعند الله تجتمع الخصوم- شاهد ماذا فعلت في ظالم لشريكة في عمل تجاري

هذه قصة حقيقة بها الكثير من المواعظ وتحتاج منا جميعا الي الوقف علي احداثها كثير وقد سطرها ونشرها الكاتي الصحفي حسن عبدالستار واليكم القصة

وعند الله تجتمع الخصوم
يقول صديقي: في 2017 تقريباً كنت بزور خالي في معهد الأورام في القاهرة .. كان عنده سرطان الدم وكان بيتعالج هناك .. الله يرحمه بقي ما قعدش 15 يوم ومات.
كان في الاوضة أربع سراير بينهم فواصل عبارة عن ستائر كدا وأنا كنت مقيم مع خالي مرافق ليه .. وكان جنبنا سرير كدا فيه واحد صعيدي مريض بسرطان في الرئة .. الراجل ده بالليل ما كناش بنعرف نغفل لحظة من بكاه .. وكل ما ينام شوية يقوم من النوم يصرخ مفزوع.
أنا كل ده طبعاً فاهم إن ده من تأثير الكيماوي والألم بتاعه
لحد ما قام مفزوع في ليلة ودخلت من الستارة أطمن عليه وأجبله حاجة دافيه يشربها وقعدت أطمن فيه وأقوله معلش ألم الكيماوي صعب بس ده إختبار من ربنا وقريب هتخف وكدا يعني ..
فالراجل ضحكلي ضحكة غريبة كده وقالي ألم الكيماوى!!.. هو إنت فاكرني يا إبني بعيط من ألم الكيماوي .. الألم اللي جوايا يا إبني مفيش جبل يتحمله .. وعمال يبكي.
طب قولي مالك .. إحكيلي يا عم أحمد .. فيه إيه .. عاوز إيه أعملهولك؟!.
قال: خلاص العمل عمل ربك بقى.. ولقيته بيقول هو ممكن ربنا يخليه يسامحني؟!
هو مين يا عم أحمد؟!
قال: واحد ظلمته.. ظلمته جامد.. ما رحمتوش ولا رحمت عياله... ما صعبش علي منظره وهو بيبكي ويقولي مستنيك قدام ربنا.. قلبي ما رقش لتلات ولاد وبنتين وأمهم وهو ماشي بيهم بعد ما سرقت شقاه.. والراجل حرفياً الدموع غرقت الملاية.
إحكيلي يا عم أحمد؟!.
قال: الطمع.. أيوة الطمع وموت القلب.. الراجل كان شريكي في تجارة كبيرة وليه معايا نصها ومن طيبته سابلي كل حاجة أديرها، وعلشان أنا كان عليا "مخ إبليس" طلعته من التجارة مالوش مليم أحمر ومديون كمان.. والناس كانت عارفة إني ظالمه بس أنا كنت مرتب ورقي كويس قوي.. وبعد قعدات وجري ومحاكم .. مطالش مني ولا مليم ..وأنا كل مدى قلبي بيموت وبيجمد، وأقول عيالي أولى وخلاص لما غلب منى باع بيته وطلع من البلد.
ويوم ما طلع عدى عليا في الوكالة وقدام الناس قالي: "أنا ماشي بس مستنيك قدام ربنا".
ولا هز كلامه فيا شعرة .. ومشي .. وأنا الدنيا إحلوت معايا بشكل غير معقول لدرجة إني صدقت إن دا مالي وحلالي وحجيت كام مرة وعملت كام عمرة وبقت الفلوس معايا مش عارف عددها .. كبرت العيال وإتعلمت ومنهم اللي مسك معايا التجارة وعربيات ودنيا وأول ما تعبت رموني في البيت زي الكلب، وكل حاجة تبعهم ... ولما حسيت إن التعب بيزيد قولتلهم فيه واحد ليه عندي دين وعاوز أسدده قالولي: يوم القيامة إبقى قابله وسدده!!
عم احمد فضل يعيط بحرقة وقال: إفتكرت كلمة الراجل لما قالي مستنيك قدام ربنا!!
بعدها سألت عن شريكي اللي ظلمته وعرفت أن عياله ما شاء الله بقوا في دنيا تانية وأن ربنا كرمهم، وأبوهم مات من فترة ولما طلبت يسامحوني.. قالولي: والله لو دخول الجنة واقف علي حسنة مننا ما هتاخدها.
عم احمد قال: عيالي لما لقوني تعبتهم .. رموني في المستشفي، وبقوا يبعتولي أي حاجة مع سواق من اللي شغالين معاهم، ولا حد منهم دور عليا.
وفعلا ما كانش حد بيجيله إلا واحد إسمه محسن سواق في الوكالة.
عم احمد قال: كل ما أغمض عيني أشوف شريكي اللي ظلمته قدامي بيقولي خلاص ما بقاش إلا القليل وحقي هاخده .. كل ما أغمض عينيا أشوفه قدامي ...عذاب يا ابني ...عذاب يا ابني ربنا ما يكتبه عليك ....و تقولي ألم الكيماوي.
الراجل صوت عياطه لم الناس علينا.. بس أصعب جملة الراجل ده قالها والله قشعرت منها، لما قال: أنا بقالي شهر كل ما انام أشوف مكاني في جهنم!!
يقول صديقي: مات خالي وفي يوم روحت بعد موت خالي أسال على عم احمد، قالولي مات لوحده مكنش حد معاه.