كان متجوزها عرفي .. تفاصيل صادمة في واقعة مقتل سيدة على يد زوجها بالمطرية

زواجهم كان عرفي والجميع كان يعلم ذلك، لكن قتل الزوج لسيدة الزواج العرفي، كانت صدمة لدى أهالي منطقة عزبة عاطف بالمطرية، وعن سبب القتل وحكاية زواجهم العرفي لم يعلمه الكثير، فرح نجلها لمقتلها وهرب زوجها بعد ضربه لها حتى الموت.

تفاصيل الحادثة

كانوا بيضربوا بعض في الشارع قدام الناس، يعني قتلْه ليها كنت متوقعه، هكذا بدأ الشاب "فارس" أحد شهود العيان عند سؤاله عن السيدة المقتولة علي يد زوجها مستكملا "هو كان متجوز قبل إما الست دي تدخل حياته، حياته كانت مستقرة محدش سمع عنه ولا طليقته حاجه وأنجب منها ولدين وبنت عمرها 5 شهور، لكن الحياة دي مطولتش وطلقها، وده كان بسبب أن المقتولة كانت بتشككه دايما في أولاده وأنهم مش منه".

وتابع فارس: هي أكبر منه ب10 سنين، كانت دايما بتطلعله الشقة وهو يطردها، وكنا بنسمع صوت زعيق وضرب دايما فوق عنده، ودخلوا في علاقة لحد معلمته يشرب الآيس ومخدرات تانية".

وأضاف شاهد العيان وجار المتهم حسن: “يوم الحادثة سمعنا طفلة صغيرة بتصوت، وبتقول “كنت طالعة فوق الشقة عندنا لقيت الباب مفتوح ولما دخلت عندهم لقيت الست مديحة وقعة على الأرض”، لما طلعنا نشوف لقينها واقعة على الأرض ومتعورة في رأسها بس مفيش دم، وكان جمبها ماسورة حديد، وقبليها ب 3 أيام حد من الأهالي شاف حسن وهو بيجري بس مشكش أنه ممكن يكون قاتلها".

وذكر فارس: “ هي كانت عورته قبل كده بالسكينة في الشارع والضرب وصل بالأيدي والسب والقذف، محدش كان بيتدخل لأنهم كانوا شاربين، وكلنا كنا متضررين من وجودهم في الشارع”.

وعند الذهاب لطليقة حسن قالت "أنا استغربت إن حسن ممكن يعمل كده، الست هي اللي علمته يشرب الآيس ويدمن، وكانت عورته قبل كده بالسكينة في دراعه حتى ضربوا بعض في الشارع، وتابعت " كانت دايما بتطعن في شرفي وقالت إن أولادي مش من طليقي، وهو جه وحصل خناقة بينه وبين والدي عشان شاكك أنهم مش أولاده".

واستكملت:" لما الوضع وصل للشرف مقدرتش أسكت ورحت عملت تحليل DNA وبعديها هو عرف أنهم أولاده ومعايا ورق وتحاليل بده، وعمري ما تخيلت لحظة أنه يصدقها ويكذبني انا عشرة 13 سنة زواج".

وأضافت: " أنا عمري ماشوفتها لكن هي كانت دايما بتجيب في سيرتي بالوحش، وهي كانت متجوزة قبل كده وولادها في سني، لكن كان معروف عنها أنها خاربة البيوت".

وأشارت: “يوم ما الحكومة وصلت لبيت طليقي واللي بقي بيتي دلوقتي، ابنها جه وقال ”تستحق القتل" لأنها اتجوزت بعد ما خلفتهم وسابتهم وراحت اتجوزت عرفي كذا مرة".

شهدت منطقة المطرية بالقاهرة جريمة بشعة عندما أقدم عامل على قتل زوجته في شهر العسل وتم ضبطه بعد هروبه لسوهاج.

تلقت أجهزة الأمن بمديرية أمن القاهرة بلاغًا من شرطة النجدة بوجود جثة داخل عقار بأحد الشوارع بدائرة قسم شرطة المطرية، وعلى الفور انتقلت الأجهزة الأمنية لمكان الحادث، وعثرت على جثة سيدة مقتولة بطريقة بشعة وعلى جسدها آثار تعذيب شديد وكدمات وكسور، وبعمل التحريات دلت إلى أن وراء ارتكاب الجريمة زوجها بسبب خلافات معه وأنه تزوجها منذ أيام وكان دائم التعدي عليها وتعذيبها.

وأضافت التحريات أن يوم ارتكاب الجريمة أحضر المتهم ماسورة حديدية وضرب بها زوجته عدة مرات حتى توفيت وهرب لبلدته في سوهاج ونجحت مأمورية أمنية في ضبطه واقتياده للقاهرة وتبين إلقاءه أداة الجريمة في الطريق العام.

يأتي ذلك فيما يقوم رجال المباحث باستكمال عمل التحريات، وسؤال شهود العيان وتفريغ كاميرات المراقبة للوقوف على كافة ملابسات الحادث، وتحرر المحضر اللازم بالواقعة وأخطرت النيابة العامة للتحقيق.