محمود قطة .. اللي يحضر العفريت يصرفه .- وحوار حول الجن وتحضيره وبيع الكتب القديمة

حوار : حسن سليمان

في حوار جرئ مع تاجر الكتب والروحاني ( محمود قطة )
تناول الحوار الحديث حول الجن وتلبسه ببني الأنسان .. هل الجن يتشكل في صورة قطة .. كيف يتعرض الجن لبني الانسان وما الوقاية .. التحذير من كتب السحر ومواقع تحضير الجن عبر وسائل التواصل .. وغيرها من الموضوعات ...
الأسم : محمود سيد الشهير ( محمود قطة )
الا تتضايق من هذا الأسم ؟
لا فأنا معروف بهذا الاسم منذ زمن والقطط اصاحبي لا افارقهم .
القط المجاور لك على الكرسي اسمه ايه ؟
محمود : اسمه ميزو هو مريح شوية كان عنده شغل كتير فتعب وجه يريح .
وفين فرج ؟
فرج بقى قط كبير في السن بيجي الصبح يفطر ومش بشوفه غير اخر النهار ، بيلف في المنطقة مش فاضي .
خلينا في موضوع الجن .
يا عم احنا مالنا ومالهم احنا في حالنا وهما في حالهم
لكنهم بيتلبسوا ببني الأنسان !
محمود قطة : ايه السبب عاكس القطة تخربشك مش انت اللي بتحضرهم واللي يحضر العفريت يصرفه انت عارف لو حد ماشي في الشارع وانت ناديت عليه وبعدين قلتله خلاص مش عايزك هيزعل منك فما بالك بالجن كيان تاني خالص تقوم انت تنادي عليه وتحضره وطبعا علشان يحضر ليها ترتيبات واذونات وتغيرات في المعالم وترتيب تاني خالص صعب .. صعب وبعدين تقوله خلاص مش عايزك لا الحكاية متنفعش كده .

طيب العمل ايه ؟
قطة : متتعرضلهمش من الأصل .
حصل وتم التحضير ايه العمل ؟
قطة : عليك بالقرآن ولو مش بتعرف تشوف شيخ جامع يقرأ عليك قرآن بص احنا قاعدين الآن فيه معانا جن .
قاطعته : تقصد القرين ؟!
قطة : لا القرين ده امر تاني خالص ، اقصد جن فعلا لكن مش بيتعرض لنا هم اصلا بيخافوا مننا بيترعبوا فيه حاجز بيننا وبينهم لا يستطيعوا تخطيه الا اذا انت كسرت هذا الحاجز .
مقاطعا : وكيف يتم تخطي هذا الحاجز ؟!
قطة : متجيش انت تحضره بكتب السحر وتقولي انه مش هيتعرضلك .. متجيش تدلق عليه مياه ساخنة في الحمام ومش عايز يتعرضلك ده انت ممكن تقتل احد ابناءه بهذه المياه الساخنة في الحمام فيقوم هو ينتقم منك ولو مقدرش عليك او انت متحصن يتعرض لأهل بيتك .
العمل ايه يا قطة ؟!!
متلقش مياه ساخنة استنى لما تبرد او سمس الله يقوم هم ينصرفوا يعرفوا ان في شيء هيحصل علشان مش يتعرض لك ابعد عنهم متحضرهمش من مواقع النت وكتب السحر .
طيب يا خوده : مش انتم اللي بتبيعوا الكتب ده .
قطة : لا استنى احنا مش بنتعمد نبيعها احنا بنبيع كتب قديمة مستعملة فيها الحلو والوحش وانا مش اللي بيختار لك تقرأ ايه كل واحد وله دماغ .. يعرف يميز ايه ينفعه وايه يضره .
ايه رأيك في كتاب شمس المعارف الكبرى ؟
قطة : ابعد عن كل الكتب اللي فيها تحضير وزي ما قلتلك اللي يحضر العفريت يصرفه ولو معرش يصرفه يبقى يلبس .
يواصل قطة : ربنا جعل بيننا حاجر الخفاء .. ولا تسألوا عن اشياء ان تبدى لكم تسوئكم .. خليهم في حالهم متتعرضلهمش .. الجن ماش في الشارع الآن هل هو تعرضلك ؟! ميقدرش علشان فيه حاجز ربنا جعله بيننا وهم ملتزمون احنا اللي بنخالف فنلبس ومنزعلش .
فاجأة استيقظ القط ميزوا كما يسميه محمود قطة .. فأنشغل به وراح يقول للقط ميزو فين البوسة على خدي ؟! والغريبة ان القط بينفذ التعليمات بالحرف ويبوسه على خده .. واستيقظت باقي القطط فقال لهم هيا على المياه كل واحد يشرب ويوسع لأخوه والقطط تنفذ التعليمات !!!.
اسمع يا قطة هل اشتغلت في موضوع الرصد ( البحث عن الكنوز المخفية بباطن الأرض ) ؟
قطة : بالفعل اشتغلت فيها زمان ايام الشباب .
وهل استخرجت شيئا ؟
الحقيقة : لا قطة ، لو كنت خرجت حاجة كان الحال اتغير .
كتير من الناس يا حوده اشتغل في الموضوع ده والنتيجة مخيبة ايه السر ؟
محمود : هي مسألة رزق .. ولو اتوجدت حاجة بتعوض القديم والجديد يعنى الواحد يفضل يشتغل سنين وفجأة يظهرله الكنز فيغير حاله . يعنى تنصح بالعمل في هذا المجال ؟1
قطة : الحقيقة لا انصح به بيوت كتير اتخربت بسبب هذه الموضوعات وخاصة اللي بيتعاملوا بالسحر .
لماذا ؟!
قطة : لأن الجن بتطلب منهم طلبات صعبة وفظيعة .
زي أيه مثلا ؟!
قطة : بيطلبوا دم .
دم حيوانات وطيور خروف يتيم وكده او هدهد وحداني هههههههه .
قطة : يا عم ده كلام الافلام ..
طيب ايه طلباتهم ؟1
قطة : دم بني ادم يظفر بيه فتحة المقبرة او الرصد .. وفيه بيطب جنس .. الساحر بيطب ينام مع صاحب او صاحبة الرصد في الحرام وطلبات اخرى مينفعش اقولها ..
وضح أكثر ؟
قطة : لحد هنا وكفاية .. سامحني !!!
طيب يا قطة هسيبك الآن ولكن على موعد بلقاء اخر .
قطة : ماشي يا سيدي لكن النصيحة محدش يتعرض لهم ( اللي يحضر العفريت يا اما يكون قادر يصرفه يا اما يسيبه في حاله ) .