مواقف وجدعنة المصري في الشده بتبان
نسمع عن الشهامة ومواقفها مما يدل علي جدعنة المصريين لتكون مثلا للرجولة وتكشف المعدن الاصيل للمصرين وهذا موقف من هذة المواقف استحق طرفية عن جدارة كامل التقدير فشاهد ماذا حدث؟
السلام عليكم ورحمه الله وبركاته .. الحقيقه أنا هتكلم عن تجربه شخصيه حصلت معايا هنا في الجروب وفعلا لحد دلوقتي مش مصدق اللي حصل معايا والموضوع زي مايكون حدوته بتتكحي قبل النوم .. الموضوع ببساطه شديده أنا نزلت أعلان في الجروب إني ببيع السياره لظروف خاصه .. الحقيقة أن أبني كان محتاج عمليه ضروري وأنا مكانش متوفر معايا المبلغ دا .. وفي حد هنا في الجروب أتواصل معايا عشان يشتري السياره والحقيقه بمنتهي الامانه إني قولتلوا علي الموضوع كلوا .. وفعلا الأخ المحترم وبدون ذكر أسماء وبناء علي طلبوا هو شخصيا إني مقولش إسمه بعد مااستأذنتوا طبعا إني هعمل بوست واحكي اللي حصل معايا هو جالي البيت مشكورا عشان يتفرج على العربيه وبالفعل اتفرج علي العربيه واتفقنا علي السعر .. وكل حاجه تمام فوجئت أنه بيقولي عاوز اشوف ابنك قولتلوا خير يافندم في حاجه قالي لا أنا بس عاوز اطمن عليه وفعلا شاف أبني واطمن عليه وقالي ألف سلامه وأن شاء الله ربنا يتم شفاه علي خير .. وهنا ابتدا الموضوع كليا وجزئيا .. الراجل المحترم طلعلي المبلغ المتفق عليه كامل وقالي أعمل العمليه لأبنك ولما تخلص هاجي أستلم العربيه قولتلوا إزاي يافندم قالي انا مسافر كام يوم وهرجع أخد العربيه قولتلوا خلاص يافندم أنا هعملك ورق العربيه بكرا وهتكون جاهزه قالي لا استني شويه أنا هبعتلك الورق اللي هتعمل العربيه بأسمه قولتلوا تمام يافندم هكتبلك وصل بأني استلمت المبلغ دا من حضرتك .. بعد اكتر من نص ساعة أنه مكانش عاوز حتي ورقه بالمبلغ لكن أنا صممت علي كدا .. وفعلا خلاص أنا ودعت العربيه .. وفي انتظار إني اخلص الورق .. توكلت على الله وعملت العمليه لأبني والحقيقه إني شوفت أصعب 5 أيام في حياتي والحمدلله ربنا كرمني والعمليه تمام وكل حاجه مشيت بأمر الله كويسه .. ومن كتر تعبي نمت اكتر من يومين .. وبعدين كلمت الشخص المحترم دا وقولتوا يافندم حضرتك مبعتش مين اللي هيتعمل العربيه بأسمه .. وحرفيا أول كلمه قالهالي إبنك عامل ايه .. قولتلوا الحمدلله وكل حاجه بأمر الله كويسه .. فرح جدا وقالي أنا هاجي اطمن عليه .. وبالفعل بعدها بيومين جالي وخلاص أنا كنت بودع العربيه الوداع الاخير وتاني فوجئت أن الشخص دا بيقولي لما يكون معاك المبلغ ردهولي في أي وقت. .. بمنتهي الامانه أنا بقيت حاسس اني بحلم وأن اللي بيحصل دا مستحيل يكون حقيقه .. بأختصار وأسف علي الاطاله بس كان لازم احكي اللي حصل لأن فعلاً الموضوع طلع مش مجرد جروب للعربيات وبس لا طبعا دا في هنا أعضاء عندهم من الحس الاخلاقي والمشاعر الإنسانية والصادقه تكفي مصر كلها .. بجد مش هعرف أرد جميلك مع أبني والحمدلله أن ربنا كان رؤوف معايا للنهايه .. ملحوظه انا رجعت نص المبلغ ولسه باقي النص والورقه اللي كنت كاتبها بالمبلغ في تاني زياره الشخص المحترم إبن الأصول ربنا يبارك فيك ويخليك لأولاك صمم إني اخدها .. أسف علي الاطاله بس حقيقي كان لازم احكي اللي حصل .. دمتم سالمين أخوتي الكرام
