الجني الفاجر .. بهدل ديك البرابر

يا رب ..
أبني .. سندي وظهري
كنت شايله للزمن ..
ما أعرفش أن كل ده مستخبيلي
ماذا حدث يا حاج ؟!
ليه عامل في نفسك كده ؟!
كنت شغال في أمان الله ..
وربنا موسعها عليا ..
الرزق بزيادة ..
والخلفة أربع قمرات ( بنات يعني )
الزوجة صالحة ومطيعة والحمد لله ..
طيب فيه أيه ؟!!
طلبت من ربنا يرزقني ولد يشيل أسمي
وربنا حقق منايا .. ورزقني بديك البرابر ..
طيب عايز أيه تاني ربنا أعطاك كل حاجة !!
ما هو الحلو ما يكملش
عطاهوني باليمين وأخذوا بالشمال
يا رجل ماتكفرش بربنا .. أكيد له حكمة
وعموما ربنا يرحمه أدعيله وأترحم عليه
بعد الشر أبني عايش ما ماتش
أمرك عجيب يا راجل أنت !!!
طيب أيه اللي أنت عامل ده ..
بص يا سيدي ..
لما ديك البرابر شد حيله شويه
لقيته واد طري وني كده
قلت أخده شويه من حضن أمه
وأعلمه يسترجل شويه
عداك العيب .. شيء جميل
لأ .. مش جميل
هنرجع تاني للألغاز
يا عم أصبر عليا ..
الواد نزل معايا ويوم وراء يوم
بدأ يتودك وياخد على الشغل ..
وهب بقى يطلع على السقالة ويشيل شغل
قلت كده فل قوي ..
اقدر أعتمد عليه وأسيب له حالي ومالي
ويشيل أربع بنات وأمهم ..
جميل قوي اللي حصل ..
زفت قوي اللي حصل ..
هنرجع للفزلكة والألغاز !!
صبرك بالله ..
في يوم وهو فوق السقالة
فرطت رجله وسقط على الأرض
يا ساتر يا رب .. أكيد دي عين
عين بقى ولا مش عين ..
من يومها والحال أتبدل ..
بهدلة في أمه وأخواته
ينزل بالأيام منعرفش عنه حاجة
من كام يوم واحد مقابلني
بيقول : سايب أبنك ليه كده ؟!
قمت زي المسروع هو فين أنت شوفته
طيب عامل إيه .. بقالي أسبوع بدور عليه
شفته ماشي بهدوم مبهدلة وشعره منكوش
وحالته تصعب على الكافر ..
دلني الله يرضى عنك شوفته فين ؟
ولفينا لحد ما لقيناه
حبسته في البيت ..
وبقيت أدخل له الأكل وأقفل عليه
استغفل أمه وعلى سهوة خلع وهرب
وبقينا كل فترة نلاقي حد من الجيران جايبه معاه
مش قلتلك عطهوني باليمين وأخذه بالشمال ..
استغفر ربك ..
رحمتك يا رب ..
عرضناه على كتير من الأطباء
ورأيهم الواد سليم مفهوش حاجة
طيب اللي هو فيه ده أسمه إيه ؟!
يا ناس حد يدلني ؟!
زورته المشايخ .. والله والكنائس كمان
مفيش فايده !!
سيبها على الله وأنا هعرفك برجل طيب بتاع ربنا
هيعمل إيه يعني أكثر من اللي أتعمل
خليها على الله ..
بعد كام يوم لقيت الشيخ أمامي
وهات يا قراءة ودعاوي ..
والواد يتشال ويتحط
لدرجة أني كنت هاقوم على الشيخ
إيه اللي أنت بتعمله .. سحر ده ولا إيه
وإيه التعويذة اللي بهدلت الواد كده
تعويذة إيه يا عم الحاج
أنت شفت كلمة واحدة مش عربي واضح
كل الحكاية آيات وأدعية .. وشوية عطور
ربك والحق الواد بعد الجلسة دي نام سطيحة
لدرجة أني قلت مش هيطلع عليه الصبح
وكنت هطلع على بيت الشيخ أجيبه من قفاه
ده الحيلة حتى ولو كان من غير مخ
حتى ولو كان أهبل ..
الواد صحي وقعد معانا وفطر ولبس هدومه
ونزل الجامع يصلي !!
الغريبة أني لقيته بيصلي بالناس إمام !!!
قلت الحمد لله هم وأنزاح
وربنا شال عنه .. وعني
ما فتش أسبوع وأنتكس أكثر من الأول
جريت على الشيخ ..
وهات يا جلسات لحد يوم المفاجأة !!
صوت غريب من جوه الواد
بيتكلم بطريقة غريبة ..
مش هسيبه غير لما أخد حقي منه !!
الشيخ : حق إيه ؟ هو عمل لك إيه ؟
وقع على رأسي وكان هيخلص عليا
الشيخ : هو مش شايفك وهو ما يعرفش
الجني : يعني يموتني وأسيبه
الشيخ : من الظلم أنك تحاسب حد على شيء مش مقصود
وبعدين أنت بهدلته بما فيه الكفاية .. ولازم تسيبه في حاله
الجني : مش هسيبه ومحدش هيقدر يعمل معايا حاجة
بعد حوار طويل والشيخ يسأله عن دينه ويعرض عليه التوبة
وينصحه عن الظلم والصوت الغريب ده مش عاجبه الكلام ...
الشيخ : أنا صبرت عليك كتير ..
وراح الشيخ في تحدي وهات يا قراءة وتعاويذ ( أدعية )
وهب لقيت الواد يصرخ ويتمرمغ في الأرض
ويصب في عرق ..
كأن حنفية مياه أتفتحت ..
وأغمي عليه ..
الشيخ قال : ما تخفوش عليه أن شاء الله يبقى تمام ..
وفعلا .. ربنا أخذ بيده وتمم شفاه
ومن يومها وهو في حضن المسجد
وفعلا بقى ظهري وسندي
ببركة تعويذة الشيخ ...