هو البريكس هيفيدنا فى ايه ؟

هو البريكس هيفيدنا فى ايه ؟ سؤال يتردد كثيرا منذ الاعلان عن قبول طلب مصر قبولها عضوا بالمجموعة وهو ما اجاب عنة الصحفي محمود العربي عبر صفحتة قائلا

تعالى اقولك ..

احنا فى ال ١١ شهر الاولى من عام ٢٠٢٢

استوردنا احتياجاتنا من دول البريكس اللى هما :

الصين بقيمة 14.4 مليار دولار.

روسيا بقيمة 4.1 مليار دولار.

الهند بقيمة 4.1 مليار دولار.

البرازيل بقيمة 3.6 مليار دولار.

السعودية بقيمة 7.9 مليار دولار.

بإجمالى 34.1 مليار دولار كنا بنحتاج نوفرهم سنويا عشان مصر تستورد احتياجاتها .. و ده مش اجمالى عام ٢٠٢٢ اعتقد الرقم اصبح اكبر من كدة فى نهاية العام ..

بعد دخولنا البريكس هنقدر نعمل تبادل تجارى مع الدول دى بالعملات المحلية وهيخف الضغط على مصر فى توفير الرقم الدولارى الكبير ده سنويا واللى بيعتبر ٣٥ % تقريبا من احتياجات مصر للعملة الامريكية لاستيراد احتياجاتها وبالتالى هيقل الطلب على الدولار ويزيد العرض فينخفض سعره ..

توسع البريكس فى انضمام الدول له وتدعيم التبادل التجارى بالعملات المحلية

وبالتدريج مع توسع البريكس فى انضمام الدول له وتدعيم التبادل التجارى بالعملات المحلية تسعير وفوترة هيقل تدريجيا الطلب على الدولار ويزيد الجلب على سلة عملات مختلفة وهى عملات دول البريكس المحلية .

وبكدة مش هيبقا الدولار ورقة ضغط علينا .. وهيقل الطلب عليه والمنحنى بتاعه هينزل وده معناه مفهوم طبعا بالنسبة للجنيه المصري .. ومش هيبقا عندنا مشكلة فى استيراد السلع زى دلوقتى واللى عاملة ازمة بسبب عدم توفر الدولار وارتفاع سعره ..

قروض من البريكس لمشاريع البنية التحتية

وبالنسبة للقروض هنقدر ناخد قروض من البريكس لمشاريع البنية التحتية وتدعيمها بشروط ميسرة وده هيخفف ضغط صندوق النقد الدولى علينا واصبح عندنا خيار او بديل اكثر يسرا .. الخ