بالتزامن مع موجة الحر.. أزمة انقطاع الكهرباء تثير غضب المصريين
انقطاع الكهرباء، لا تزال أزمة انقطاع الكهرباء تشغل بال المصريين، الذين دشنوا هاشتاجا بعنوان "أنا أرفض قطع الكهرباء"، الذي تصدر مواقع التواصل الاجتماعي، كما تفاعل العديد من المشاهير مع أزمة قطع الكهرباء مطالبين بسرعة حل المشكلة.
أزمة انقطاع الكهرباء تثير غضب المصريين
وأثارت أزمة انقطاع الكهرباء، التي تصل في بعض الأماكن إلى أكثر من 3 ساعات، ردود أفعال واسعة وغضب نشطاء مواقع التواصل الاجتماعي من المصريين، الذين رفضوا عملية قطع الكهرباء عن المصريين، وأكد البعض أن ذلك تسبب في خسائر فادحة لهم.
علقت الاستشارية الدولية في التنمية الدكتورة ماجدة غنيم على عملية قطع الكهرباء في مصر، فقالت: "بعد ما انتهت فترة قطع الكهرباء المنتظمة نزلت أخلص مشوار، رجعت لقيتها قطعت تاني والمرة دى عن المنطقة كلها مش البلوك بتاعنا. النتيجة قعدت في الشارع من ٩ الى ١٢ وربع مساء لأن صحتي ما تسمحش أطلع ١٣ دور. مش من حق حد يعمل فينا كده أيا كان.."
وتابعت ماجدة غنيم "الثلاجة باظت بسبب قطع الكهربا. علشان أشتري زيها محتاجة حوالي ٤٦ ألف جنيه، دى تالت خسارة أجهزة مباشرة بعد هارد دسك باللي عليه وشفاط مطبخ ضربت فيشته وضربته معاها أروح لمين"
الشعب روحه في مناخيره
أما الإعلامي إبراهيم عيسى فقال: "تواضعوا للشعب فالشعب روحه في مناخيره"
أما الإعلامي أحمد موسي فقال: "حبى لبلدى ولأهل مصر يدفعنى للحديث المستمر عن شكاوى الأهل والأحباب فى مصر بسبب معاناتهم من الكهرباء.. لا بد من حل حقيقى وجذرى لهذه الأزمة.. درجات الحرارة رهيبة.. أرجوكم لازم حل ناجز وعاجل.. المواطن يشكو ولايريد سماع أى خبر سوى حل أزمة الكهرباء.."
وتابع أحمد موسى "الناس تحملت كثيرا وأتمنى من الدكتور مصطفى مدبولى رئيس مجلس الوزراء أن يجد حلا حقيقيا بدون مسكنات وفى تقديرى وثقتى فى رئيس الوزراء سنرى اليوم التحرك من أجل شعب مصر الذى يستحق دائما الأفضل. عاشت مصر وشعبها العظيم.. نتمنى الحلول لأزمة الكهرباء"
الكهربا بتقطع 4 ساعات والناس زهقت
أما الناقد الرياضي إكرامي الرديني فقال: "الناس زهقت مارينا وسيدي عبد الرحمن والعلمين مفيش فصل كهربا نهائي والإضاءة ضهر، ودي الأماكن اللي اتأكدت منها لغاية دلوقتي... مفيش ناس يتقطع عليها كهربا 4 ساعات وناس ميتقطعش عليها ثانية وبعدين الثانوية العامة شغالة إزاي يتقطع النور لغاية آخر الأسبوع، دي كلمة حق واللي يزعل يزعل أنا معرفش أبعاد فصل الكهربا ايه بس اللي اعرفه اللي يقطع يقطع على الكل"
قطع الكهرباء عن طلبة الثانوية العامة
وتابع إكرامي الرديني "واللي أعرفه إن مفيش ظرف في أي بيت مصري أكتر من ظرف الثانوية العامة، ملحوظة النهاردة الكهربا قطعت عندي من الساعه 7 مساء إلى 11 وقطعت تاني من الساعة 1:30 إلى الآن وده مايرضيش ربنا، في حاجه كمان لما الكهربا بتقطع الناس بتنزل الشارع ومعظمهم بيستخدم عربيته اللي عنده عربية، ماهو بيستهلك بنزين زياده أو المحلات بتستهلك سولار للمولد الكهربائي أو غاز للعربيات الغاز اللي هو أصلا مش موجود علشان نشغل محطات الكهربا! يعني اللي بنوفره بقطع الكهربا بتستهلكه!"
أنا أرفض قطع الكهرباء يتصدر
وعلق أحد النشطاء عاطف حمد فقال: " قطع الكهرباء ولو ساعة غير آدمي ومرفوض.. تقليل النفقات يبقى في الرفاهيات مش أساسيات عيشتنا... #أنا_أرفض_قطع_الكهرباء"
ورد أحد نشطاء مواقع التواصل الاجتماعي فقال: "يعني إيه أكون طالب ثانوية عامة والنور عندي يقطع ٣ساعات بالنهار وساعتين بليل وفى عز الحر والامتحانات يعني عايز اعرف... #أنا_أرفض_قطع_الكهرباء"
وقال الناشط محمد مهنى: "أين إدارة الخطة والأزمات لمواجهة مثل تلك المشاكل سواء كانت طارئة أو مزمنة عموما تم الإعلان اليوم عن اجتماع مجلس الوزراء بسبب أزمة الكهرباء في انتظار قراراتهم...!!!"
وعلق الناشط عمرو فقال: "والله طلبة الثانوية العامة المفروض يديهم درجات على الحر وقطع الكهرباء"
