عمرو يوسف يكشف حقيقة ضربة لعامل في الجونة
كشف الفنان عمرو يوسف تفاصيل الشائعات التي انتشرت ومتعلقة باعتدائه على عامل في الجونة خلال مهرجان الجونة، ورد على الواقعة لأول مرة قائلا: «تعرضت لظلم شديد وأغلبية الوقت مش برد وأول مرة اتكلم عن الموضوع ده واللي حصل إنه نزل خبر إنى اعتديت على عامل عشان طلب يتصور معايا، ومش متخيل إزاي حد يصدق حاجة زي كده إني أضرب شخص نفسه يتصور معايا وده عبث».
وأضاف الفنان عمرو يوسف، خلال حواره ببرنامج «حبر سري»، مع أسما إبراهيم، على قناة القاهرة والناس: «الحقيقة كنا معزومين على العشاء في ثالث ليلة من أيام المهرجان وكنا 20 واحدا على الترابيزة والولد ده كان حاطط كاميرا التليفون على صدره وبيصور بخبث وكشفته وقلت له بتعمل إيه خاف وساب الفون وجري وطلعت برة لقيت الولد واقف برة وقلت له افتح الفون خاف وطلع يجري».
وتابع: «واحد من زمايله جه وفتح لي التليفون لقيته مصور لايف 3 دقائق ودخلت بصيت على فونه لقيت بلاوي على التليفون، وخليت التليفون معايا وثاني يوم خاله اتصل على الفون ورديت عليه وبيقولي أنا عرفت القصة وأنا بعتذر لك وأمه كلمتني واعتذرت لي وقالت لى ابني نفسه يمثل وهو كل يوم بيعمل لنا مشكلة».
واستكمل: «أمه كانت خايفة أبلغ عنه والتليفون كان فيه حاجات تحبسه وتوديه في ستين داهية والتليفون كان كارثة، وقلت لهم أنا همسح التليفون بالكامل وهرجع لكم التليفون والولد غلطان 100%، وطلع بعدها إشاعة إنى أنا اللي ضربته وده محصلش خالص»
وحول رأيه في «الاختيار 3»، أكد أن المسلسل مهم للغاية بأجزائه الثلاثة، مضيفًا: «سعيد جدا بيه ونفسي يفضل مستمر، وأعتقد دي قوة الدراما والقوى الناعمة بتاعتنا».
وذكر أن ما يقدمه المسلسل أقوى من أي وسائل إعلامية أو صحفية، مؤكدًا أن الفن المصري قوي ومؤثر للغاية في الوطن العربية بأكمله.
ورد على سؤال حول عدم تواجده في مسلسل «الاختيار» بأجزائه الثلاثة، قائلا: «ياريت، نفسي والله بس متعرضش عليا حاجة للأسف»، على حد تعبيره.
مسلسل «الاختيار 3» من بطولة كريم عبدالعزيز وأحمد عز وأحمد السقا، مع مشاركة مجموعة كبرى من الفنانين، ومن تأليف هاني سرحان، وإخراج بيتر ميمي.
ويتناول المسلسل فترة حاسمة من تاريخ البلاد، وهي التي مرت بها خلال عام 2013 إبان انطلاق ثورة 30 يونيو، التي نجحت في الإطاحة بجماعة الإخوان.
