زوجة تفضح زوجها جوزي «مالوش في الستات» ومشغول بشغلة

مشكلتي مع زوجي انه مدمن ... لكن مش اي نوع من الادمان ... ده مدمن شغل ... قبل ما نتجوز جوزي حالته المادية مكنتش اوي .. واترفد من اكتر من شغلانة .. لكن ربنا كرمه بعد كده بشغل كويس لكن المشكلة دلوقتي انه الشغل عنده رقم واحد علي حساب اي حد.
شغله مفروض انه من 9 ل 6 .. لكن الحقيقة هو ممكن يقعد في الشغل ل 11 بالليل ويرجع يدوب ينام ويروح الشغل تاني.. ولو رجع ممكن مديره يكلمه يفتح اللابتوب ويكمل شغل.. وحتي في الاجازة ممكن اي حد يتصل بيه ويفتح اللااب ويشتغل بالساعات ..
حتي لو خرجنا وحد كلمه ممكن يقولنا ارجعو انتوا البيت وانا هروح الشغل .. وصلت ان حتي في العلاقة بينا ممكن يسيبني عشان لو حد كلمه ... كلمته كتير انه يشوف شغل تاني لكن هو رده ربنا يسهل وان شاء الله..
الي عرفته انه زملاءه في الشغل مش زيه كده وان ممكن الشغل الي بيطلب منه يتأجل لبكرة عادي ... فكرت ان يكون بيخوني مع واحدة في الشغل وبقيت اتجسس علي موبايله .. وحطيت له برنامج يسجل مكالمات ويبعت لي صور من الكاميرا بتاعة الموبايل.. لكن ملقتش حاجة كله شغل وكله كلام في الشغل
بدات اتابع هو فاتح ايه عالنت قلت يمكن مدمن افلام إباحية وانه بيفتح اللاب يتفرج علي افلام ويقول لي انه بيشتغل ... لكن برضه ملقتش .. مفيش غير شغل وبس .. حتي لو فيه وقت فاضي فيه وده نادرا ويتكلم معايا يحكيلي عن الشغل وبس حياتنا بقت كلها شغل شغل شغل .. حتي العلاقة بينا بقت علي فترات متباعدة وهو عايز يخلص منها بسرعة لانها بالنسبة له مهمة من المهام الي عليه عاوز يخلصها ... انا شايفاه مش طبيعي ..
مرة كنا انا وهو وصاحبه ومراته في النادي الي صاحبه عضو فيه .. انا كنت فاكره انه هيعرفنا علي بعض وبعد كده نخرج ونتقابل اسرتنا مع اسرة صاحبه.. لكن طلع انهم هيتكلموا في شغل وبعد كده كان هيوديني لماما ويطلع علي شغله واخدني معاه عشان مفيش وقت عنده...
انا نفسي يبقي طبيعي .. لدرجة اني اتمنيتت اني اشوفه بيبص علي واحدة حتي ... احس انه راجل طبيعي .. مرة واحدة في جواز 7 سنين لقيته بيبص علي واحدة في الشارع كانت بتربط الشوز ... اي واحدة مكاني كانت هتتضايق لكني فرحت ساعتها عايزة احس ان جوزي طبيعي وبيحب الستات .. لكن يا فرحة ما تمت وطلعت يعرفها عن طريق الشغل وسلم عليها وعرفها بيا وفكرت برضه انه مش بيحب الستات وبيحب الرجالة .. لكن بعد كل التجسس الي عملته موصلتش لحاجة .. انا كل الي عايزاه يكون طبيعي .. شغله يكون في مواعيد معقولة.. يهتم بيا كزوجته واحس انه عاوزني مش حاجة عايز يخلص منها عشان يبقي عمل الي عليه و يكلمني في اي حاجة غير الشغل .. نخرج نتعرف علي ناس نطلع رحلة ... هو انا الي بطلبه ده ممكن يتحقق ولا نطلق وكل واحد يروح لحاله خصوصًا ان مفيش اولاد .. وهو يعيش في شغله وانا ربنا يعوضني ببني ادم طبيعي بعد كده