رافض يسامحني علي غلطة بعد ٧ سنين جواز

متجوزة من 7 سنين وعندى ولد 5 سنين وبنت سنة زوجى مغترب بسافرله 6 شهور فى السنة وبينزل اجازة شهر ونص فى ال6 شهور التانين بحكم وجودى هناك كتير عملت علاقات وجالى فرص شغل كتير بس هو كان علطول رافض اخر حاجه جالى شغل براتب كبير 6 الاف ريال اكبر عرض جالى قبل كده كان الفان ونص بس وانا كنت فى مصر ولازم سافر فى خلال شهر استلم الشغل طبعا هو رفض واتخانقنا جامد قمت سبت البيت وسبت الاولاد لجدتهم وقلتلهم مش هو رافض شغلى وسايبلى انا العيال خلاص خليه هو يقعد بيهم وانا اشوف حالى وانتوا اولى بعيالكوا
جوزى نزل مصر بعدها ب3 او 4 ايام ومن ساعه منزل ولا عبرنى ولا اتصل حتى ولا اى حاجه بابا كلمه اكتر من مره انه يجيى يقعد معاه يقوله ربنا يسهل لما افضى ومكبر دماغه خالص وانا فى بيت بابا كده بقالى 4 شهور.
كل ده عادى لحد من شهر اكتشفت انه خطب واحدة مش بتخلف وهيتجوزوا خلاص وتقريبا خاطبها بعد شهر من رجوعه وانه مش هيسافر تانى رفعنا قضايا عليه وبابا كلمه عرفه قال لبابا وليه قضايا و مصاريف على الفاضى شوف طلباتكوا وانا مش هتأخر بابا قاله تسيبها تشتغل وتفسخ خطوبتك قاله بالنسبة لشغلها متشتغل براحتها انا مالى والخطوبه انتوا مالكو اخطب ولا افسخ هو انت فاكره انها بعد ما رمت بنتى وهى بترضع لسه تلزمنى بابا قاله انت كده مش عايز تحل وهنكمل فى القضايا رد بكل برود ربنا يوفقكوا بس بالله شوفوا محامى كويس انا عامل لحسابى لكل الاحتمالات وخليك فاكر انتى عرضت عليكم الخروج بالمعروف عشان الى هعمله بعد كده محدش يغلطنى فيه.
كلمته واعتذرتله وقلتله هتنازل عن كل القضايا ومش هشتغتل يقولى خلاص فات الاوان وحتى لو صفيتلك ورجعتلك وده مستبعد مش هتخلى عن التانية.
انا مقهورة وحاسه انى هيجرالى حاجه للدرجة دى كارهلى الخير وهان عليه عشرة سبع سنين وسهل عنده يغيرنى بواحدة تانية كانه بيغير قميص ايه الجريمة الى انا عملتها واحدة جاتلى فرصه مكنتش احلم بيها واتمسكت بيها وحتى لو غلطانه خلاص اعتذرتلك والشغل خلاص راح عليا عايز ايه تانى .
انا مش مصدقة ان دى اخرتها احنا عشنا مع بعض 7 سنين من احلى سنين عمرى حجينا مع بعض اكتر من مره وشفت منه حنيه مشفتهاش من اهلى ليه يتحول للقسوه دى انا كل لحظة بتمنى اموت وارتاح مش متخيله انه خلاص هيكون فى حضن واحدة غيرى وانها هتكون مكانى وانا هخسر بيتى وجوزى وعيالى.