بعد سنة ونص عايشين في الحرام قررت تسيبني وترجع لجوزها !!
أنا عندى 40 سنه متزوج وعندى 3 أطفال قضيت 20 سنه فى الغربه بس كنت بتزل اجازات ورجعت استقريت فى مصر بدأت حياتى فى مصر بعد 20 سنه غربه من الصفر سواء فى التعرف على الاوضاع أو معارف أو معامله اتعرفت على واحده فى الشغل إللى أنا فيه فجأة وبدون مقدمات لقيتها بتقولى انا بحبك واقسم بالله العظيم أنا ما كنت ببصلها غير شغل وبس مجرد ما سمعت الكلمه منها لقيت نفسى واحده واحده بتشد ليها واهتمامها الزايد بيا خلانى احبها واتعلق بيها جدا .
المشكله انها كانت متجوزه وجديد معداش على جوازها كام شهر لقينا نفسنا كل يوم خروج بعد الشغل وكلام على الموبايل طول الليل وبعد تعرفنا على بعض بفتره صغيره غلطنا ووقعنا فى الحرام لما ده حصل اتعاهدنا قدام ربنا إنها تطلق ونتجوز واخدنا عهد قدام ربنا اننا متجوزين وجوزها اختلفت معاه وخلته ساب البيت ومشى لإنهم كانوا متجوزين فى بيت أهلها قضينا مع بعض سنه و7 شهور متجوزين قدام ربنا لغايه لما تطلق وبعدين نتجوز خلال الفتره دى كان بيحصل بينا مشاكل بسبب الغيره عليها وعليا وبسبب مراتى وكده بقينا نبعد ونرجع واتكرر الموضوع آكتر من مره بس إحنا روحنا فى بعض بجد والله العظيم من شهر بالظبط اختلفنا على حاجه خايبه وبعدنا مكناش بنتكلم خالص ولما البعد طال جيت اكلمها معرفتش ولا كانت بترد عليا حاولت بكل الطرق انى اكلمها ونتصالح وانا عارف انى كنت غلطان زى ما هى غلطانه وأنا فعلا جيت عليها كتير وكانت بتستحملنى عشان ظروف البيت عندى وكده بس قولت داخل العيد ومينفعش نفضل زعلانين ردت عليا وقالتلى أنا خلاص هرجع لجوزى ونتصالح مصدقتش وكانت بالنسبالى صدمه العمر
ويكمل رسالتة قائلا عملت المستحيل عشان اصالحها منفعش النهارده روحتلها مكان شغلها واتكلمت معاها قالتلى أنا خلاص اتكلمت مع جوزى وهنتصالح ونرجع لبعض وانت السبب عشان أنتا إللى عملت المشكله حاولت بكل الطرق اخليها ترجعلى منفعش كل المحاولات أنا دلوقتى حاسس إنى بموت حرفيا وحاسس إن الدنيا سوده فى عينى ومش عارف أعمل اية أنا والله العظيم عارف إن إللى عملناه حرام وربنا بيعاقبنى على الغلط وعارف كمان إن مفيش حاجه اسمها عاهدنا ربنا وهى متجوزه أنا عارف كل الكلام اللى ممكن يتقال ويجرح فينا إللى أنا محتاجه والله العظيم نصيحه ودعوه من قلوبكم انى اعدى المرحله دى انصحونى أعمل إيه عشان أقدر أبعد واستحمل وادعولى ربنا يسامحنى وعلى دماغى أى كومنت نقض قبل النصيحه جزاكم الله خير
