كندة علوش تكشف تفاصيل إصابتها بسرطان الثدي
كشفت الفنانة كندة علوش سر اختفائها عن الساحة الفنية خلال الفترة الماضية.
وقالت كندة علوش: بقالي فترة طويلة غايبة عن الناس سواء كشغل أو كدراما أو سواء حتى كحضور إعلامي وفيه أسباب كتير وراء اختفائي ولكن السبب الأساسي المرض".
مخطط كندة علوش في مشوار إنجاب الأطفال
ولفتت الفنانة كندة علوش خلال لقائها الخاص مع الإعلامية منى الشاذلي على قناتها الخاصة على "يوتيوب": "بعدما أنجبت بنتي حياة وكنت مخططة يبقى فيه أولاد كتير وكان فيه محاولتين قبل إنجاب ابني كريم بس راح البيبي وبعد كده كنت حامل في ابني كريم وكنت سعيدة جدا وحافظت على الجنين بشروط صحية ومريت بظروف قاسية".
معاناة كندة علوش مع إنجاب ابنها كريم
مرض كندة علوش، وتابعت:"ولدت كريم ابني قبل ميعاده الطبيعي بحوالي 3 شهور، ومدخلش حتى الشهر السابع وده كان رعب بس علشان الطب اتطور في مصر الحالات بقت أقل خطورة من الأول، بس كنت في حالة ذعر، وكريم دخل الحضانة وقعد فيها حوالي شهرين، وفي آخر 20 يوم طمنوني أنه هيبقى كويس بس وضعه كان صعبا وكان مسمحولي أشوفه بس ربع ساعة ودي أصعب فترة في حياتي".
مرض كندة علوش في الثدي
وواصلت: "رضعت كريم ابني 9 شهور وبعدها بقيت أحس إني عندي مشكلة ومش عارفة أكمل وفيه ألم ومشكلة في أحد الثديين ووقفت رضاعة، ولما وقفته حسيت إن فيه مشكلة وغلطت إني متابعتش بس كنت معتقده أنه علشان احتقان بسبب الرضاعة ولكن عملت فحص قالولي التهاب فمشيت عادي على أنه التهاب".
كندة علوش تكشف تفاصيل إصابتها بسرطان الثدي
وأوضحت: "شهر وشهرين الأعراض اللي كانت عندي في الثدي مكنتش بتروح ولكني مش موسوسة ولا بخاف وبسلم أمري لله بزيادة، ولما مر 5 شهور على المشكلة ومش بتنتهي عمرو يوسف قاللي أنتي عندك مشكلة بتشتكى منها طول الوقت فقال لي أعملي فحص رسمي".
وأكدت: "لما روحت عند دكتورة الأشعة من أول ما شافتني قالت لي فيه حاجة مش مظبوطة ولازم ناخد عينة قلت لها تمام وهي وشها كان ملون، وقالت لي المنظر مش مطمئن وبعد العينة بحوالي 5 أيام راجل التحاليل أخبرني بإن النتيجة مش كويسة وإن فيه اكتر من ورم خبيث، أخدت الموضوع تنحت في الأول بس منهرتش ولا عيطت، وروحت عرفت عمرو يوسف".
موقف عمرو يوسف من مرض كندة علوش
وتابعت: "عمرو يوسف إيجابي بس كان قلقان، وكان حاسس أن هيبقى فيه حاجة، المشكلة أنه كان فيه أكتر من ورم خبيث في الثدي، وأنا عندي في تاريخ العائلة جدتي وخالتي وخالي توفوا بالسرطان، وبرضو كنت مستبعدة الموضوع".
وأوضحت: "فيه دكتور بنثق فيه وعالج والد عمرو لما كان مصابا بالسرطان، وروحنا وطلع اللي عندي مش كتلة ولكن عقدة متشبعة وفي الحالة اللي زي دي مينفعش أعمل عملية ولكن أخد علاج كيماوي لمدة طويلة لحد لما العقدة تصغرة نشيلها بالجراحة وبعدين يبقى فيه علاج الإشعاعي والهرموني حسب نوع السرطان اللي عندي".
وأكملت: "ربنا ساعدني بشكل كبير ونزل عليا من أول ثانية سكينة وطمئنينة، أنا عدى على لحظة اكتشافي المرض سنة وشهر ولسه باخد جرعات العلاج الكيماوي بالإضافة إلة العلاج الهرموني وخلصت العلاج الإشعاعي، الورم اللي كان عندي كان بقاله فترة ومكنتش اعرف".
