ام العيال تصرخ بعد ١٣ سنة جواز جوزي عايز يتجوز زميلته المنحرفة
دلوقتي جوزي شغال في فندق بيحب واحدة زميلته ، في العلاقة دي بقالهم حوالي سنة ونص هي بنت لسة ماتجوزتش عندها ٣٥ سنة ملهاش شكل ولا هي احلي مني بالعكس الحمد لله انا علي قدر كبير من الجمال، ومعندهاش اخلاقيات نهائي
وكمان شغالة في صالة القمار ، كلمتها لما اكتشفت أنهم علي علاقة بعض غلطت فيا اووووي وقالت لي اكيد قرف منك عشان كدة عاوز يتجوز عليكي وهو فعلا عاوز يتجوزها وهي عمالة تمثل عليه أنها من عيلة محافظة ووالدتها بتوصلها الشغل والكلام الفارغ ده ،حتي لما بيقولها تعالي نخرج بتقوله لا هقول لماما ايه وهي اصلا منحرفة و بتبات في صالة القمار ،طبعا الكلام ده عرفته من الشات اللي بينهم ،
دلوقتي بعد ١٣ سنة جواز عاوز يتجوز ها ومتمسك بيها بس كل لما اواجهه بينكر ويقولي خلاص انا نهيت الموضوع ده ، مع العلم باباه اتوفي واحنا مخطوبين قالي مش هسيب ماما لوحدها واتجوزنا مع مامته في الشقة وقعدت معاه عالحلوة والمرة ولما والدته الله يرحمها تعبت انا اللي شيلتها من الالف الي الياء مع أن ليها بنت ومامته لسة متوفيه من ١٠ شهور .
انا معايا بنتين وولد والولد ده احتياجات خاصة ، قولولي آمن نفسي وولادي ازاي ، خايفة يطلعني من شقتي في يوم من الايام عشان مخه اتلحس خااااالص ومتمسك بيها مع أنه بينكر العلاقة دائما
