شاهدافضل معالم سياحية لاهل الفيوم

تعد محافظة الفيوم من المحافظات السياحية ورصد بوست متداول علي صفحات فيس بوك اهم المعالم السياحية بالمحافظة وقال البوست
لما تبقي مولود ومتربي في محافظة زي الفيوم ليها ٤ معالم سياحية يتيمه معروفه بالأسم والمكان وهما ( السواقي - عين السليين - بحيرة قارون - وادي الريان ) وتبقي معظم زياراتك وانت طفل ، فمثلاً بحيرة قارون تروح انت واهلك من صباح الخير لمساء الورد وتقضي يوم لذيذ وتروح بيتك او تعمل فرحك في كنوز ولا بحيرة البط ولا اللؤلؤة ولا الاوبرچ ، وانت راجع تعدي علي عين السليين ابوك يشتري لك البرنيطه السعف ويشتري مانجو وعنب الخ الخ ….
ويوم ما تحب تخرج انت واصحابك في الفيوم مفيش غير وسط البلد وتقعدوا عند السواقي شويتين وتتمشوا و تنسوا همومكم شوية…
جيل التمانينات و التسعينات اللي يعرفوا الفيوم كويس هيعرفوا انا بحكي في ايه ….
ولما بحيرة قارون تتحول بقدرة قادر لمصفاة للصرف الزراعي و رائحة مقرفة ويتم هجرها بالجمله وتبقي اطلال ..
ولما عين السليين تبقي خراب متلاقيش فيها غير قطط وكلاب بتجري ورا بعضها ..
ولما منطقة السواقي تتقفل ولا تقدر تمشي علي رجليك ولا بعربية ولا حتي بحمار علشان في مشروع ما بيتم انشاءه من سنين وفي الاخر طلع عبارة عن مجمع أكشاك او محلات - الله اعلم - والطرق حواليها مكسره وشكلها يصعب علي كفار قريش حتى ..
ولما وادي الريان اللي كان قبلة الزائرين يبقي عباره عن بحيرات مهجوره اكيد يبقي في حاجه غلط …
للأسف الفيوم بقت محافظة مهمله منسيه بتهالك مرافقها وتكسير طرقها (بالمناسبة مافيش ولا شارع سليم حتى عند مبنى المحافظة نفسها ) وانتشار ظواهر غريبة عليها زي التسول عند اشارات المرور وظاهرة السايس اللي لازم تدفع له اجباري والا هتشد معاه ويا عالم بالحاجات اللي هو ضاربها واللي باينه علي وشه وكلامه ممكن يعمل ايه وكله كوم والقمامة كوم تاني ..
اعتقد الفيوم بقت صاحبة الرقم القياسي في القمامة المرميه في الشوارع - الجانبيه - واللي طبعاً مصحوبه بالحشرات والامراض ولما تكلم حد في الحي او مكتب النضافة تسمع نفس الجمله ( مفيش عمال ) طيب انا كمواطن بدفع ضرايب ومش برتكب جرايم والمفروض اني فرد نافع في المجتمع مطلوب مني اتحمل واصبر واقول يارب غير الحال للافضل ….
لما باشوف الفيوم دلوقت بافتكر الراجل المحترم الله يرحمه اللى مجرد ذكر اسمه تبتسم و تترحم عليه و اصلا احنا مش فاكرين اسم اى محافظ بعده ..