التحول من التعاطف الي الكراهية لمحمدكشري
التحول من التعاطف مع عامل النظافة لكرهه .. وتمني ليه انه يتطرد من كل مكان سببه عامل النظافة نفسه ولا يعني ان اللي عمله محل الكشري كويس..
يعني بص معايا كدا .. في خلال 4 ايام :
- عامل النظافة يحضر عزاء الديب ببودي جارد.
- عامل النظافة معاه مدير اعمال.
- عامل النظافة يرفض 1000 جنيه للظهور في الفضائيات ويطلب رقم اكبر.
- عامل النظافة يهاجم أحمد العوضي
- عامل النظافة يتعاقد على اغنية مع ابن شعبان عبد الرحيم .. والاخير عنده موهبة فنية جبارة .. الحقيقي ودا مش تنمر .. بس لا ابن شعبان عبد الرحيم بيعرف يغني .. ولا عامل النظافة من كلامه صوته سليم .. بس اهو فيه ترند يلا نركبه.
- عامل النظافة لازم اتصور مع كل الناس مقدرش اكسف حد.
- خطوبة عامل النظافة من مذيعة على الهواء.
- عامل النظافة في لوكيشن تصوير فيلم التاروت .. عايز امثل.
كل دا ليه .. يعني ايه المنجز اللي حضرتك عملته .. انت راجل على عينا وعلى راسنا حصل معاك موقف مش ظريف والناس تعاطفت معاك .. وقالتلك معلش .. وانتهى الحوار .. لكن اللي حصل بعد كدا يكره اي حد فيك ..
انت عامل نظافة .. سواق .. خباز .. اي معنة كنت بتشتغلها فهي عمل شريف.. ترجع شغلتك وتشوف أكل عيشك وانتهينا .. لكن هتبقى محور الكون ونجم العالم دا مش منطقي .. لان بكرا هنلاقي كل الناس بتتطرد طالما دا طريق سهل للشهرة..
انا دايما بقول الشهرة شهوة زيها زي شهوة الاكل .. الانسان بيحب في الغالب الاعم بيحب يبقى مشهور .. يحب الناس تتكلم عنه وتشاور عليه .. الشهرة ممكن تحولها لفلوس .. يعني مثلا .. انا مشهور .. فهقدر اعمل بيزنس وانجحه بالشهرة .. تخيل مثلا لاعب من الاهلي فتح مطعم..شكرا المطعم فتح من قبل ما يشتغل .. مش لانه شيف كويس .. لا لانه حد مشهور...
كمان الشهرة وسيلة سريعة للثراء .. يعني مثلا انت بتعزق طول الشهر بـ 3 الاف جنيه .. ويوم ما تاخد 8 الاف .. الشارع بتاعكم بيبصلك فيهم وتتعامل معاملة النجيب ساويرس.. لكن فنانة ممكن تطلع نص ساعة مع اسعاد يونس وتاخد 400 الف جنيه مثلا. ..
لكن السؤال .. انت هتشتهر ليه .. وهتتشهر بإيه .. وهتعمل ايه بالشهرة دي ذاتس ذا كويستشن.. لانه الشهرة زي ما هي حاجة حلوة كمان ليه ضريبة .. ضريبة كبيرة قوي .. وكما قال احدهم: "مفيش حاجة بلوشي"..
فيا محمد يا صديقي .. ربنا يهديك .. واتكن كدا وشوف اكل عيشك .. بدل ما هنلاقي في يوم ناس تكرم كشري التحرير علشان طردك .. خليك حسيس يا ابو عمو..
